19 april 2022
Die Zuid-Afrikahuis se drumpel is behoorlik hierdie week deurgetrap deur besoekers vanuit Suid-Afrika. Op Maandag 12 April het die joernalis Mia Spies ’n draai gemaak. Die Zuid-Afrikahuis was ’n moet -sien gedurende haar reis deur Europa. Spies is die aanbieder van die gewilde podsending Nuus Met Spies, wat ’n ingeligte bik op die Suid-Afrikaanse nuuslandskap bied. Soos wat Mia by die deur uitgestap het om die res van Amsterdam te verken, het sy vir Gerrie Pretorius en sy filmspan op die voorstoep raakgeloop! Gerrie is ’n Suid-Afrikaanse TV-aanbieder en sanger. Sy albums het Platinum-status in Suid-Afrika behaal en sy program Leef Jou Reis met Gerrie Pretorius is ’n stapelprogram vir Suid-Afrikaanse kykers. Pretorius is besig om te skiet aan Leef Jou Reis en hy het meer kom leer oor die bande wat daar tussen Suid-Afrika en die Lae Lande bestaan.
Die opwinding het nie Maandag tot ’n einde gekom nie. Dinsdag het die akteurs en skrywers Beer Adriaanse en Carla Smith gevra om ’n toer van die Huis te ontvang en te gesels oor projekte wat in die toekoms hier onderneem kan word. Hulle was opgewonde om ’n paar van hul vriende se films in die Huis se versameling raak te sien, en het entoesiasties ’n paar voorstelle gegee om die versameling uit te brei.
Van Woensdag af word die Huis gebruik om ’n dokumentêr te skiet wat deur die bekroonde aktrise en regisseur Charlene Brouwer onderneem word. Die vervaardiger Niel van Deventer en die joernalis Hendrik Hancke vorm ook deel van die span. Van Deventer het voorheen die Huis besoek en die rustige atmosfeer en pragtige binnekant van sy vorige besoek onthou.
As jy ook besoek by die Zuid-Afrikahuis wil aflê terwyl jy in Amsterdam is, stuur gerus ’n e-pos na info@zuisafrikahuis.nl om jou besoek te reël.
